Jogging..

Oleh : AdukaTaruna

Hari ni den nak koba dalam bahaso noghori. Ontah apo gilo ontah, tetibo yo datang angin den nak jogging. Lamo boto den tak main bola. Ghaso2 eh dah naik tombam den ni.

Lopeh Subuh tadi den toghuih saghung kasut. Den nulih ni pon lopeh balik jogging la ni. Bopoloh-poloh den koba kau. Warm up takdo, apo takdo, den toruih laghi. Banyak gak pacik-pakcik, uncle2, yang jongging samo. Habih den potong. Ghaso banggo plak.

Laghi punyo laghi den dah sampai kodai makan membo den. Haghi golap laie. Nampak akak kodai tu tongah nyiang ikan. Den soghogah. Muahahahaha. Melatah deh den koba kau. Nyaghih-nyaghih den kono baeh dongan pisau.

Tak sompek nak ambek hongap, den nak kono leter dongan akak tu. Hongeh!

Duduk punyo duduk, totiba datang ghaso maleh. Apo yang akak tu ceghabe an dah den tak poduli. Palo otak den asyik mikir. Cano lak den nak balik ni. Nak jogging? Umang ai. Tak tedayo ghaso eh. Jalan kaki? Ghaso golap jap maso dopan. Tak buleh jadi nih. Nyosa lak den jongging sampai sini. Kot tau stamina den tak macam dulu, den jogging koliling ghumah yo.

Tak lamo, membo den tibo. Bawak mutu. Dio kojo ngan akak tu. Cantet, den koba. Den toghuih pinjam mutu eh.

“Kang den pulang an la. Ekau bukan poie memano pun.”

Den pun balik ghumah dongan mutu. Muahahaha. Giang hati den ghaso eh.

Lalalalalalalalalalalalala........

Soliseh skali laie dongan pakcik-uncle tadi. Den potong lagi dioghang. Hahahaha. Kan main bolagak den. Siap hon lagi.

Tin! Tin!